Merkado sa Lungsod sa Batuan nasunog

Mokabat ngadto sa napulo ka mga stalls sa Batuan Public Market ang nasunog gumikan lamang sa faulty electrical wiring niadtong nakalabay nga gabii. Nasayran sa taho nga nagsugod mga alas 11:55 sa gabii niadtong Martes didto sa usa ka Baguio Electrical Supplies nga gipanag-iyahan sa usa ka Dodong Baguio.

Si SPO2 Eduardo Ramara sa Batuan Police Station nibutyag nga dali ra ningkatap ang kalayo sa kasikbit nga mga stalls sa atubangan sa merkado nga naglinya padulong sa direksyon sa lungsod sa Bilar. Samtang ang direksyon sa lungsod sa Carmen wala malakip.

Matud ni Ramara nga ningkabat pa ngadto sa 20 ka minutos nga nakaabot ang firetruck gikan sa lungsod sa Carmen ug nisunod ang kabomberohan gikan sa Lungsod sa Balilihan, Loay, Trinidad, Ubay, Talibon, Valencia ug Dimiao.

Gibana banaang moabot ngadto sa P700mil ang inisyal nga danyos apan gilantaw kini nga modako pa kun matapos ang gihimo nga imbestigasyon. Dugang ni Ramara nga ilang gidudahan nga electrical short-circuit ang hinungdan sa maong sunog. (Andy Nalzaro with reports from Amado-Carmen correspondent)

Read more @ BoholNewsDaily